LIGJET E BIZNESIT
Edhe pse ka kaluar një javë nga shembja e Teatrit Kombëtar, kjo ngelet një nga temat më të diskutuara në rradhët e opinionit publik por edhe të politikës.
Aksioni u ndërmor orët e para të mëngjesit të së dielës më 17 maj, ndërkohë të gjithë skeptikët pyetën se përse u zgjodh ky orar.
Në lidhje me këtë ka folur edhe ministrja e Shtetit për Marrëdhënien me Parlamentin Elisa Spiropali.
Ajo ka treguar edhe arsyen e përzgjedhjes së këtij orari duke thënë se kjo u bë për të shmangur përplasjen që sipas saj shumica të kryente detyrën dhe pakica të dëmtohej sa më pak.
“Nuk mund të ishte situatë normale përsa kohë që një grup njerëzish e kishin uzurpuar ndërtesën prej 2 vitesh e gjysmë. Janë bërë shumë dëgjesa publike, ku të gjitha palët kanë shprehur mendimin e tyre dhe ai grup i vogël kundër shembjes nuk do të kishte ndryshuar mendje në dëgjesa të tjera. Duke e ditur që do të kishte rezistencë, u zgjodh ajo mënyrë dhe ajo kohë për të shmangur përplasjen, që shumica të kryente detyrën dhe pakica të dëmtohej sa më pak”, – deklaroi Spiropali për A2.
Sipas saj, “asnjë qytetar nuk ka të drejtë të pushtojë një godinë”.
“Ata nuk lejonin që të hynin në teatër as qytetarë të tjerë. Ajo rezistencë u kthye në bërthamë politike që mbështetet nga opozita jashtëparlamentare. Besoj se kemi bërë gjënë e duhur pasi aty do të ngrihet një teatër dinjitoz. Ata që dalin në foltore të improvizuara, nxjerrin lista me këshilltarë bashkiakë, bëjnë thirrje për shpërndarje Parlamenti, janë të gjithë trushpëlarë”, deklaroi ndër të tjera Spiropali.
