“Po pllakos varfëria e tejskajshme” Basha ngre alarmin: Xhepat e shqiptarëve janë shkundur nga pandemia Rama

Kryedemokrati flet pas takimeve me qytetarët dhe bizneset

Paraditja e sotme ka qenë me angazhime të shumta për kryetarin e Partisë Demokratike Lulzim Basha.

Ai ka zhvilluar disa takime në terren me qytetarë të ndryshëm dhe përfaqësues të bizneseve.

Kryedemokrati më pas ka ndarë me ndjekësit e tij foto nga takimet, dhe thekson se ata e kanë respektuar në tërësi distancimin social dhe rregullat e higjienës.

Basha ndër të tjera ngre alarmin se varfëria po pllakos familjet edhe se xhepat e shqiptarëve janë shkundur nga pandemia ekonomike e qeverisë Rama.

REAGIMI I PLOTE I KRYETARIT TE PD LULZIM BASHA

Pjesa më e madhe e qytetarëve që takoj në Tiranë i kanë respektuar rregullat e higjenës dhe të distancimit social.

Megjithatë shqetësim serioz mbetet situata ekonomike e rënduar nga pandemia e COVID-19. Janë të shumtë qytetarët që nuk kanë marrë asnjë lek ndihmë për kohën e kaluar mbyllur në shtëpi.

Edhe bizneset përballen me vështirësi të mëdha. Mungesa e ndihmës rrezikon mbylljen e shumë prej tyre ndërsa të shumtë janë dhe ata që janë detyruar të heqin të punësuar nga listpagesat.

Qeveria Rama i la pa ndihmë shumicën e qytetarëve dhe bizneseve. Rinisja e aktivitetit normal është shumë e vështirë për ta tashmë që veç faturave dhe taksave të larta, përballen me uljen e numrit të blerësve dhe ankthin për të ardhmen e pasigurt.

Xhepat e shqiptarëve janë shkundur nga pandemia ekonomike e qeverisë Rama. Asnjë formë propagande dhe cirku qeveritar nuk e fsheh dot pasigurinë dhe varfërinë e tejskajshme që po pllakos në familjet shqiptare.