LIGJET E BIZNESIT
Që prej fillimit të pandemisë së koronavirusit, sektorë të rëndësishëm të ekonomisë në vend po përballen me vështirësi të mëdha financiare.
Edhe pse nga qeveria është komunikuar për masa lehtësuese, mund të themi se ekonomia ka marrë një goditje të fortë deri më tani.
Një rast i tillë vjen edhe nga transporti publik.
Së fundmi, Kujtim Mema kryetari i “Shoqatës Transporti Kombëtar Interurban” në studion “ABC News” ka folur për vështirësitë që kanë linjat urbane për shkak të karantinës. Ai theksoi se në këtë kohë pandemie linjat janë në një situatë jo të mirë, ndërsa shtoi se Ministria, drejtoritë duhet të sensibilizohen dhe premtimet të mos mbeten vetëm në letër.
“Shoqëritë e Transportit të Udhëtarëve në Shqipëri janë shoqëri aksionare të cilët kanë mjetet e tyre dhe punojnë për familjet e tyre. Shumica e transportit ndërqytetës janë me kredi dhe një kredi e dytë nuk na bën mirë, pasi dy kredi bashkë është e vështirë për ti shlyer. Jemi tkurrur ekonomikisht. Referuar edhe vendeve fqinje ndoshta ka ardhur momenti që të bëhet një hapje e punës, pasi në këtë mënyrë jemi drejt falimentimit”, tha Mema.
Ndër të tjera ai u shpreh se do të bëjnë një kërkesë për Bashkinë Tiranë që taksa të ulet, pasi kanë tre muaj pa punë.
“Parashikimi jonë për tu kthyer në normalitet është nga 20 shtatori. Korriku dhe gushti janë dy muaj që nuk ka lëvizje.
Situata e protokollit të sigurisë mund të na çojë në rritje të biletës. Kjo nuk është e qëllimshme, por e detyrueshme. Nëse do të shkojmë më gjysmë kapaciteti, bileta do të detyrohet me 30%, të rritet edhe pse pritet që të shikohet se si do të vijojë situata”, u shpreh Mema.
