Pas arrestimit të babait, zv.ministrja e Arsimit jep dorëheqjen

Zëvendës ministrja e Arsimit Lorena Haxhiu dha dorëheqjen pasi i ati, Eduart Haxhiu u arrestua si pjesë e një grupi të strukturuar kriminal që dërgonte emigrant në SHBA, Kanada dhe Britaninë e Madhe.

Mësohet se Haxhiu i ka paraqitur dorëheqjen kryeministrit Rama menjëherë sapo i ati u arrestua.

Në kuadër të operacionit të koduar “Crystal Eagle”, ku u arrestuan 22 persoan për falsifikim të vizave nga Shqipëria drejt SHBA dy ditë më parë, mes tyre është edhe Eduart Haxhiu, babai i zv.ministres së Arsimit, Lorena Haxhiu.

Eduart Haxhiu, 52 vjeç, banues në Tiranë u dënua me “arrest me burg” nga Gjykata e Posaçme, si i dyshuar për veprat penale “Ndihma për kalim të paligjshëm të kufijve” më shumë se njëherë , “Falsifikimi i letërnjoftimeve , pasaportave dhe vizave” , “Grupi i strukturuar kriminal”, “Kryerja nga vepra penale nga organizata kriminale dhe grupi i strukturuar kriminal”.

Lorena Haxhiu u votua nga Këshilli i Ministrave për të zënë vendin vakant që la Besa Shahini si zv.ministre, ndërkohë që ajo zuri vendin e Lindita Nikollës. Pëprara këtij pozicioni, ish-prezantuesja e emisioneve, ka qenë drejtoreshë e Shërbimit Rinor, drejtori në varësi të Ministrisë së Arsimit.