Një ngjarje e rëndë është parandaluar nga policia së fundmi në Mirditë.
Mësohet se në pranga ka rënë një 35-vjeçar me iniciale E.SH, i cili pas një konflikti të momentit i ka thyer xhamin e makinës një personi tjetër me iniciale V.P dhe më pas ka tentuar ta vrasë me armë zjarri.
Ndërkohë, mbi 35-vjeçarin e arrestuar rëndojnë akuzat për veprat penale si “Kanosja”, “Armëmbajtja pa leje” dhe “Shkatërrim prone.”
NJOFTIMI ZYRTAR I POLICISE
Parandalohet përshkallëzimi i mëtejshëm i një konflikti mes dy personave. Kanosi me armë zjarri një shtetas, duke e kërcënuar se do ta vriste, falë ndërhyrjes së menjëhershme të Policisë u vu në pranga 35-vjeçari. Sekuestrohet një armë zjarri pistoletë. Shërbimet e Komisariatit të Policisë Mirditë, pas njoftimit të marrë se në Rrëshen, Mirditë, kishte konflikt mes dy shtetasve, ku një prej tyre kishte dhe armë zjarri, kanë shkuar menjëherë në adresën e dhënë, ku kontatuan se:
Shtetasi E. Sh., pas një konflikti të çastit, për motive të dobëta, me shtetasin V. P., i kishte thyer xhamin e makinës këtij shtetasi dhe po e kërcënonte me armë zjarri për ta vrarë. Në momentin që shërbimet e Policisë janë afruar në vendin e ngjarjes, shtetasi E. Sh. është larguar me shpejtësi, por nuk ka mundur dot të largohet pasi është kapur pas disa minutash ndjekjeje nga shërbimet e Policisë Mirditë. Gjatë kontrollit fizik shërbimet e Policisë i gjetën armën e zjarrit pistoletë me të cilën ky shtetas kishte kanosur për vrasje shtetasin V. P. Në përfundim të veprimeve u bë arrestimi i shtetasit E. Sh., 35 vjeç, banues në Nderfane, Mirditë, për veprat penale në ngarkim të tij “Kanosja”, “Armëmbajtja pa leje” dhe “Shkatërrim prone”. Materialet i kaluan Prokurorisë së Rrethit Gjyqësor Lezhë, për veprime të mëtejshme.
