Minatorët preken nga COVID-19, mbyllet miniera e arit

164 minatorë të minierës më të thellë të arit në botë, Mponeng në Afrikën e Jugut kanë rezultuar të prekur nga COVID 19. Si pasojë, puna është ndërprerë. Sipas BBC-së, muajin e kaluar minatorët u rikthyen në punë, pasi kishin ndaluar në muajin mars, pas rasteve të para me koronavirus. Miniera funksionoi me një kapacitet rreth 50%, por pas shfaqjes së rasteve shumë punonjës ngritën shqetësimin mbi sigurinë e tyre.

Shumica e atyre që rezultuan pozitivë ishin asimptomatikë. Sipas pronarëve të minierës, të gjithë personat që kanë rezultuar pozitivë janë futur në izolim. Afrika e Jugut është shteti me shumicën e rasteve me koronavirus në Afrikë, me 21.343 persona që kanë rezultuar pozitivë, nga të cilët 407 kanë ndërruar jetë.