Në një video-mesazh, drejtoresha e Qendrës së Shërbimeve Arsimore (QSHA), Rezana Vrapi u shpreh në lidhje me strukturën e testit të Maturës Shtetërore 2020. Vrapi ka dhënë detaje orientuese për maturantët.
Ndërkohë, thekson se testi i Maturës Shtetërore 2020, do të bazohet vetëm në pyetje me alternativa dhe se kohëzgjatja do të jetë 2 orë në total, ndërsa numri i pyetjeve do të jetë 60.
Midis të tjerave, Vrapo nënvizon se: “Është llogaritur që pyetjeve me alternativa u duhet më pak kohë se sa pyetjeve me zhvillim. Prandaj, ka një kohëzgjatje deri në 2 orë dhe jo 2 orë e gjysëm. Janë hequr pyetjet ese nga pjesa e gjuhës së huaj dhe gjuhës shqipe. Dhe i gjithë testi do të bazohet vetëm në pyetje ku nxënësit do ta përzgjedhin përgjigjen. Pra, nuk do ta shkruajnë atë. Koha është e mjaftueshme”, shprehet Vrapi.
“Nga përvoja që ka QSHA dhe pilotimi që është bërë, gjykohet se të gjitha pyetjet janë të realizueshme brenda këtij orari, pra brenda 2-orëshit”. “Patjetër që ka pyetje që duan më pak kohë se sa 1 minutë, sikurse ka edhe pyetje që mund të duan 1-2 minuta”, thekson ndër të tjera Drejtoresha e QSHA dhe në fund të video-mesazhit informon të gjithë maturantët se koha e testit është mëse e mjaftueshme që ta mbyllin brenda orarit të caktuar.
