Vendimi i Ministrisë së Arsimit për rikthimin e studentëve në auditore në muajin qershor është kundërshtuar nga pedagogu Mark Marku.
Lidhur me këtë vendim, pedagogu Marku në një intervistë për RTV Ora, shprehet se në një kohë kur qeveria njofton se do të hapen lokalet vetëm në ambientet e jashtme, studentëve u thuhet të futen në auditore.
“Ka një kaos, këtë e ka shkaktuar urdhri i MAS. Ndërkohë që ne po vazhdonim dhe po mendonim për organizimin e formave të testimeve online në këtë moment nga Ministria doli urdhri që studentë e pedagogë nga 1 qershori do të kthehen në auditore. Ky vendim është i gabuar. Ne nuk e dimë çfarë parashikimi ka Ministria për 1 qershor, kur në vendimet e qeverisë thuhet se nga 18 maji do hapen lokalet por jashtë, do vazhdojë ndalimi i komunikimeve më tepër se 5 persona në ambiente të mbyllura”, u shpreh pedagogu Marku.
Më tej, duke folur për leksionet në distancë në auditore, pedagogu Mark Marku tha se numri i lartë i studentëve e pamundëson kushtin e ministrisë.
“E kemi të pamundur të bëjmë mësim me vetëm 5 persona. Distancimi social nuk është i mundur. Vetëm Fakulteti jonë ka 4 mijë studentë dhe 1300 studentë të viteve të fundit në bachelor dhe master dhe kemi vetëm 20 salla.Me kaq salla me 5-6 studentë ne arrijmë të administrojmë çdo orë të ditës 100 studentë, kemi 1300. Është e pamundur dhe nuk mund të bëhemi garant të masave. Duam por nuk mundohemi. Nuk kemi ambjente ashtu siç nuk kanë të gjitha Universitetet në Shqipëri”, shtoi ai.
