Kryeprokurori kritika Policisë, Lleshaj justifikohet: Hashash kultivohet dhe në Londër

Prokurori i Përgjithshëm Olsian Çela, në raportimin e tij të zhvilluar në platformën online në Komisionin e  Ligjeve, reagoi ashpër ndaj shtimit të rasteve të kultivimit të hashashit. Ky shqetësim është kryesisht në katër rrethe të vendit, Vlorë, Krujë, Gjirokastër e Shkodër.

Ndërkaq, pas këtij reagimi të prokurorit Çela, ministry i Brendshëm Sandër Lleshaj u shpreh se policia kap përditë sasira të vogla me kanabis, dhe sipas tij kultivimi është ulur nuk është rritur.

I ftuar në emisionin “Hard Talk”, ministri Lleshaj u shpreh se duhet patur parasysh se edhe në Londër kanabisi kultivohet në sasira të vogla, ndaj sipas tij nuk mund të zerohet çdo tentativë kultivimi.

“Nuk kam dijeni, sigurisht që ka rëndom, ka raste që policia kap sasira të vogla, ka gjithmonë në ulje. Ky vit ka shënuar ulje akoma të rëndësishme. Duhet të keni parasysh që kanabis në sasi të vogla kultivohet edhe në Londër. Nuk është fjala që këtu e kemi zeruar ne çdo tentativë kultivimi por e kemi ulur. Raste sporadike ka, sigurisht që ka dhe përpjekja e Policisë së Shtetit për ta kontrolluar territorin në mënyrë rigoroze dhe për të goditur çdo rast vazhdon edhe sot. Tentativat tani janë të izoluara, në sipërfaqe shumë të vogla dhe në territore shumë të largëta. Kjo tregon se mbijetesa e këtij fenomeni në Shqipëri tashmë është e pamundur”, u shpreh ministri i Brendshëm Sandër Lleshaj.