Koronavirusi nuk ndalet/ Zbulohen 2 vatra të reja në Elbasan, i infektuar shoferi dhe e moshuara

Vijon përhapja e koronavirusit në Shqipëri.

Mësohet se në 24 orët e fundit janë zbuluar 2 raste të reja në Elbasan.

Sipas informacioneve bëhet fjalë për një të moshuar 84 vjeçare nga fshati Mengel në Elbasan dhe një shofer rreth 50 vjeç që punonte në një kompani ndërtimi .

Burimet bëjnë me dije se rastet janë të ndara dhe nuk kanë lidhje me njëri-tjetrin.

E moshuara është transportuar në orët e vona të mbrëmjes së djeshme drejt spitalit infektiv pasi vuan nga sëmundje shoqëruese dhe gjendja e saj paraqitet e rënduar.

Deri më tani me këto dy raste të reja shkon në 20 numri i të infektuarve në Elbasan, ku 16 konsiderohen të mbyllura pasi personat janë shëruar.

Ditën e djeshme janë marrë 13 tampone në Elbasan, ku me zbulimin e këtyre dy rasteve do të shtohen 2 vatra.

Tani më ata duhet të hetohen për kontaktet që kanë pasur, për të frenuar kështu rritjen e numrit të të prekurve në këtë qytet.