LIGJET E BIZNESIT
Ditën e djeshme një denoncim i fortë u bë nga gazetari Basir Çollaku, i cili tha se bashkë me shembjen e godinës së Teatrit Kombëtar doli jashtë funksionit dhe sistemi TIMS, duke e bërë kështu vendin zonë të lirë për të hyrë krimi përgjatë një jave. (Kliko këtu për lajmin).
Por sot, me anë të një njoftimi zyrtar, Policia e Shtetit ka sqaruar atë që ka ndodhur, duke pranuar, edhe pse të treguar ndryshe, se më datë 23.05.2020, në orët e para të mëngjesit, si pasojë e mungesës së energjisë elektrike për shkak të një defekti, sistemi TIMS, për një kohë të shkurtër, doli jashtë funksionit.
Sipas asaj që thuhet, menjëherë pas riparimit të defektit në rrjetin elektrik të zonës, po në orët e para të mëngjesit të datës 23.05.2020, sistemi TIMS është vënë në punë dhe vijon të funksionojë normalisht në të gjitha pikat e kalimit kufitar dhe në strukturat e tjera të Policisë së Shtetit.
“Theksojmë faktin se në Pikat e Kalimit Kufitar nuk është shfaqur asnjë problematikë, pasi kufijtë janë të mbyllur dhe në orën që kishte defekt sistemi, nuk ka patur lëvizje personash.
Policia e Shtetit, aplikon regjistrimin manual të personave në çdo rast që sistemi mund të shfaqë probleme, duke bërë verifikim të thelluar të të dhënave, bazuar në listat e personave në kërkim, të cilat janë në dispozicion të punonjësve të Policisë në çdo DVP dhe Pika Kalimi Kufitar”, theksohet në njoftim.
