LIGJET E BIZNESIT
Kryedemokrati Lulzim Basha ka mbërritur mbrëmjen e sotme në amibentet e Teatrit kombëtar ndërsa nga sa u tha më parë, pritet që të kalojë natën në shenjë proteste kundër shembjes së godinës.
Në një intervistë për mediat, Basha akuzon qeverinë dhe kryeministrin Edi Rama se po tenton të grabisë 30 milionë euro.
I pyetur nga gazetarët se cila do jetë protesta e tij kundër shembjes së Teatrit, ndërkohë që tubimet janë të ndaluara për shkak të gjendjes së emergjencës nga koronavirusi, Basha tha se “kur shteti shkel Kushtetutën, qytetarët mund t’i përgjigjen me çdo mjet.
Pjesë nga deklarata e Bashës:
E gjithë kjo batërdi, kjo vjedhje, zhvatje e parave dhe taksave të shqiptarëve, ka vetëm një emër, Edi Rama. Ai do të mbaj përgjegjësi për të gjitha. Kryebashkiaku është oturaku i Edi Ramës. PD ka qenë dhe do të jetë në mbështetje të artistëve. Do të kaloj këtu orë të tëra, do të jem pranë tyre. Këta janë një regjim hajdutësh, dhe hajdutët përdorin hilet, në orën 5 të mëngjesit shkuan te Astiri dhe ne s’u mblodhëm dot.
Ne jemi këtu sot, shqiptarët janë në këtë gjendje ekonomike për shkak të tij. Duan të grabisin 30 milion euro këtu me aferën e Teatrit. E gjithë vëmendja e kryeministrit është që të grabisë prona publike. Koronavirusi tregoi fytyrën e vërtetë, sepse kur nuk ndalesh as në një pandemi të tillë nga zakoni i vjedhjes, do të thotë që je i pashpresë.
Kur shteti bie në dorë të banditëve, dhe shkel ligjin e Kushtetutën, qytetarët mund t’i përgjigjen me çdo mjet.
