Një 63-vjeçar, prej 8 ditësh rezulton të jetë i zhdukur në fshatin Rreth-Kalë të njësisë administrative Muhurr në Dibër.
Duke iu referuar deklarimeve të familjarëve, dyshohet se Sefedin Lleshi, mund të jetë mbytur në lumnin Drin. Ndërkaq, ata thonë se 63-vjeçari ka qenë duke kaluar lumin me kalë në datën 5 Maj. Por familjarët thonë se pas disa orësh klai është kthyer vetëm i përgjakur dhe i lagur dhe se nuk kishte asnjë shenjë nga Sefedin Lleshi.
Ata shprehen se kanë bërë një denoncim në Policinë e Dibrës për të nisur kërkimet, por deri më tani nuk ka pasur rezultat. Të afërmit shprehen se uniformat blu nisën kërkimet pas denoncimit, por më pas u ndërprenë. Në ndihmë të tyre shkuan edhe banorë të zonës.
Ata mundën të gjenin vetëm xhaketën e 63-vjeçarit. Familjarët bëjnë apel që të rifillojnë kërkimet për gjetjen e trupit, duke kërkuar ndërhyrjen e polumbarëve të forcave RENEA.
