Denoncimi/ Makineritë që “pastrojnë” Tiranën, por mushkëritë i bëjnë “blozë”

Bashkia Tiranë, prej kohësh ka ndërmarrë nisma të herë pas hershme për pastrimin e kryeqytetit. Aktualisht, përpos personave të posaçëm për pastrimin dhe mirëmbajtjen e kryeqytetit, Bashkia Tiranë ka vënë në dispozicion dhe disa makineri të cilat janë në shërbim të pastrimit të rrugëve.

Këto makina pastrimi, kanë disa fshesa të cilat duke u rrotulluar bëjnë fshirjen e anësoreve të rrugëve.

Ndonëse në pamje të parë përballemi me “pastrimin” e mbeturinave që mbesin në anësore të rrugëve, pasoja që kjo makineri lë, është shumë më e dëmshme për mushkëritë pasi krijojnë mjegulla tymi.

Në redaksinë e Fast News Albania, kanë mbërritur foto në të cilat shihet qartë pasoja e kësaj makinerie që “pastron” qytetin por pa e spërkatur me ujë. Dhe duke mos u spërkatur me ujë pastrimi i rrugëve përmes kësaj makineri ngre shtëllunga tymi duke e bërë të pakalueshme rrugën.

“Përshëndetje! Në Rrugën e Kavajës sapo kalova, një makinë e pastrimit, nga ato me furçë pa ujë ngriti një re tymi.”, shkruan qytetari.

Siç shihet edhe në fotot e mëposhtëme, duket qartë shqetësimi i qytetarëve pasi është një orar që ka qarkullim dhe një zonë e populluar nga banorë.