Kryeministri Edi Rama, gjatë komunikimit live, ka folur edhe se cdo të ndodhë me transportin publik apo me zhvillimin e dasmave gjatë muajve të verës. Të gjitha këto në kuadër të përgjigjeve për qytetarët e interesuar që ngrenë pyetjet.
Rama u shpreh se transporti publik do jetë i fundit që do hapet. Ky vendim vjen pasi është një sektor me rrezikshmëri të lartë në transmetimin e virusit.
Ndër të tjera, për dasmat tradicionale me shumë të ftuar ka një lajm jo fort të mirë, kjo pasi dita kur do të hapen do të jetë e largët.
Deklarata e Kryeministrit Edi Rama:
Ju e dini si janë kushtet në furgona dhe autobusë është si të vendosësh autobusë dhe furgonë në dispozicion të virusit. Po punojmë për një strategji, që është edhe një reformë në transportin publik. Durim se ende nuk jemi aty, është problem i madh.
Çfarë të bëjmë me dasmat? Asnjë aktivitet në mjedise të mbyllura me më shumë se njerëzit e familjes nuk lejohet, nuk udhëzohet, por nuk duhet të ketë as vizita dhe as dreka e darka dhe jo më të kërcasin dasmat, për cfarë do të martohen njerëzit në këto dasma masive për të kaluar muajin e mjaltit me ventilator krah për krah njëri tjetrit?
