A do të ketë një “2 mars” tjetër?

Presidenti Meta i pyetur nëse do të ketë një “2 mars” tjetër, u shpreh se për momentin me rëndësi është që Shqipëria të marrë veten nga pandemia.

Ndërkaq, sipas Kreut të Shtetit, ishte i gatshëm që të evitonte 2 marsin nëse do të merrte garanci për të mos miratuar ligje anti-kushtetuese.

Sonila Meço: Kritikët tuaj thonë që edhe duhet ta kishit shmangur 2 marsin për shkak të COVID-19?

Ilir Meta: 2 marsin nuk e bëra unë, e bënë ata që donin të shkelnin kushtetutën, që ftuan Venecian dhe pastaj miratuan ligjin që praktikisht zhvlerësonte edhe gjithë vizitën e tyre që ata kërkuan. Unë kam qenë i hapur për të evitur 2 marsin edhe pasi e kam shpallur dhe kam kërkuar garanci që nuk do të miratohen ligji anti-kushtetuese, garanci që nuk është  dhënë.

Sonila Meço: Meqë këto garanci ende nuk janë respektuar do ketë 2 mars tjetër, 2 qershor, 2 korrik, 2  gusht, 2 shtator…?

Ilir Meta: Për mua është e rëndësishme të dalim nga kjo situatë duke ruajtur kushtetutshmërinë, ligjshmërinë, të drejtat e njeriut. Duke shpëtuar sa të jetë e mundur pasojat në ekonominë kombëtare dhe familjare dhe të ecim drejt rivendosjes së plotë të rendit kushtetues ligjor dhe demokratik në vend./RTV Ora/