Kryetarja e LSI, Monika Kryemadhi ka uruar festën e pashkëve për gjithë besimtarët orthodhoks në Shqipëri përmes një mesazhi në rrjetet sociale.
Në postimin e saj Kryemadhi ndalet në mesazhin e rëndësishëm që përciell kjo festë për gjithë njerëzimin në rëndësinë e forcës së njeriut për të ndërtuar të ardhmen.
Duke u nisur nga ky mesazh kryetarja e LSI shkruan se edhe këtë situatë të keqe për shkak të COVID-19 shqiptarët do e kalojnë bashkë dhe me të fortë.
Postimi i Kryemadhit:
Festa e shenjtë e Pashkëve na mëson se sakrifica nuk është humbje dhe se ndriçimi i zemrës përmes besimit na lartëson mbi të keqen dhe antivlerat. Fuqia e shpirtit i jep njeriut forcën për të çarë mes vështirësive dhe për të ndërtuar të ardhmen.
Masat e distancimit fizik prej pandemisë nuk duhet të na ndajnë shpirtërisht nga njëri-tjetri dhe nga zakonet tona të mira. Përmes tyre, ne si komb kemi përballuar ndër shekuj vështirësi pas vështirësie, dhe sot është koha që ashtu siç kemi gjetur mënyra të reja për të kremtuar festat tona fetare, ashtu të hapim rrugën për të ndërtuar të ardhmen tonë të përbashkët. Me besimin në Zot, me dashurinë për njëri-tjetrin, me vlerat dhe traditat tona kombëtare.
Pashkë të mbara për të gjithë besimtarët ortodoksë dhe gjithë familjet shqiptare. Krishti u ngjall! ?
