U prek nga koronavirusi, drejtori i Urgjencës ka një mesazh për të gjithë: Këshilloj çdo njeri…

Drejtori i Urgjencës Kombëtare Skënder Brataj, i cili është prekur nga koronavirusi, ka folur sërish për mediat.

Mbrëmjen e djeshme ai është shprehur se është drejt shërimit të plotë dhe ka këshilluar të gjithë njerëzit që të trajtohen në banesë, pasi situata do të shkojë drejt rregullimit.

Ndërsa duke përmendur telefonatat drejt numrit 127 të Urgjencës, ai tha se tashmë thirrjet janë 3 herë më pak se në muajin mars.

“Luftën e përbashkët e ktheva në luftë personale. Jam në fazën finale, besoj se jam drejt shërimit të plotë, pa pasoja të rënda. Edhe unë si gjithë protokolli mjekësor, po qëndroj në karantinë. Akoma nuk kam bërë tamponin. Po, kam pasur simptoma të Covid-19, të mesme. Këshilloj cdo njeri të trajtohet në banesë, e jam i bindur se situata do të shkojë drejt rregullimit.

Sot janë 120 ambulanca që janë duke punuar, kemi spitalet në dispozicion të plotë. Janë mbi 1000 e ca vetë që edhe natën kujdesen për pacientët. Doja të përshëndes të gjithë bluzat e bardha. Mjekët janë krenaria e momentit. Sot u mor vesh se cfarë janë bluzat e bardha, të gjithë ata që rrezikojnë jetën për të na bërë jetën tona më të mire. Sot janë 3600 thirrje në ditë, 3 herë më pak se më 10 mars. 1200 janë për koronavirusin, jo thirrje për të sëmurë por kërkojnë informacion”, tha Skënder Brataj për programin “Real Story”.