Tronditet arti shqiptar, ndahet nga jeta aktori i humorit Gëzim Kruja

Një humbje e madhe konsiderohet lajmi më i fundit për artin shqiptar.

Mësohet se aktori i njohur i humorit shkodran, Gëzim Kruja është ndarë nga jeta pasi vuante nga një sëmundje e rëndë.

Ai konsiderohet si një nga kollosët më të mëdhenj të artit, e sidomos për zhanrin e bukur të humorit.

Prej vitesh, Kruja i ka munguar publikut edhe për shkak të problemeve të tij shëndetësore, dhe sot është shuar në moshën 81-vjeçare.

Aktori Gëzim Kruja, u lind në Shkodër më 1939.

Karrierën humoristike e nisi që në moshën 13-vjeçare. Fillimet me Estraden amatore nisin qe ne kohen kur ishte ushtar me 1958.

Më pas vazhdon aktivizimin në vitin 1960 me Estradën profesioniste të Shkodrës. Gëzim Kruja ka mbaruar në vitin 1979 Institutin e Lartë Pedagogjik, dega e Gjuhës dhe Letërsisë në Shkodër.

Ka shkruar 15 komedi, 10 recitate, 2 libra me monologe gazmorë. Ka interpretuar mbi një mijë role ne skeçe të ndryshme dhe ka 52 vite që ushtron profesionin e humoristit.