Pas 5 javëve në karantinë dhe mbyllje thuajse totale çdo aktiviteti tregtar, Shqipëria është me shifra pozitive sa i përket goditjes që ka marrë nga virusi COVID-19.
Por kjo ecuri e mirë, më së shumti për shkak të bindjes së shqiptarëve për të qendruar brenda në shtëpitë e tyre, duke mos lejuar përhapjen e këtij virusi, rrezikon të shkojë e gjitha dëm.
Dhe shkaku për këtë rrezik, është as më shumë dhe as më pak, por vetë kryeministri. Ky fundit pasi lejoji dje pensionistët të dalin deri në ora 11 paradite, dhe me krenari pa që mosha e tretë iu bind urdhrit të tij, këtë të diele e vazhdoi eksperimentimin, duke lejuar nënat me një fëmijë që të dalin shëtitje.
Por kjo praktikë e aplikuar nga qeveria shqiptare, që nuk është parë asgjëkundi, ka prodhuar një panoramë aspak të këndshme për kohët e koronavirusit në ato pak parqe që i kanë mbetur Tiranës.
Fëmijët që nuk e njohin kryeministrin si lider të pagabueshëm ende, me naivitetin e tyre, por edhe për shkak të mbylljes së gjatë brenda në shtëpi, vërshuan në parqe bashkë me bashkëmoshatarët e tyre për të luajtur.
Por edhe nënat e tyre nuk u treguan më shumë të përgjegjshme, pasi siç duket në fotot e mëposhtme nuk i kanë evituar grumbullimet, por edhe ndonjë thashethem tek tuk me mikeshat e tyre…
Me këto pamje nga Tirana, e vetmja shpresë është që përqindja e përhapjes së koronavirusit të jetë më e ultë pasdite, kur të gjithë janë të mbyllur në shtëpi…
