Sot Shqipëria në shtetrrethim, por të hënën me rregulla të reja: Ja kush do ndëshkohet me burg

Ditën e sotme Shqipëria është gdhirë në izolim të plotë, ku shtetrrethimi ka nisur që dje në orën 13.00 të drekës, e përfundon nesër në 05.00 të mëngjesit.

Kështu, të gjithë shqiptarët do të qëndrojnë 40 orë brenda pa patur mundësi të lëvizin nga banesat e tyre.

Ndërkohë nga e hëna do të fillojnë masat e rrepta, ashtu si edhe kryeministri Edi Rama paralajmëroi pak orë më parë.

Sipas tij të gjithë personat që nuk ruajnë rradhën, do të ndëshkohen rëndë, e deri në heqje lirie.

Kreu i qeverisë shtoi se në rradhat e tregjeve të fruta-perimeve do të vendoset policia dhe ushtria, duke pretenduar se kjo është e vetmja mënyrë që të triumfohet ndaj koronavirusit.

Por Rama nuk ka harruar të përmendë dhe lëshimet, ku njëra prej tyre do të jetë përdorimi i makinave personale për ata që shkojnë në punë ose zgjatja e fashave orare për lëvizjen.

Në qytetet e të gjithë vendit, vijon patrullimi i Policisë dhe Ushtrisë, që askush të mos shkelë rregullat që qeveria ka vënë prej javësh tashmë, për të frenuar përhapjen e njërës prej pandemive më të rrezikshme me të cilën po përballet njerëzimi: atë të koronavirusit të ri COVID19.