Sot rinis Kuvendi/ Ja masat e rrepta për deputetët, temat e rëndësishme që do diskutohen

Sot paradite në orën 10.00 do të mbahet seanca e parë e Kuvendit, pas mbërritjes së koronavirusit në Shqipëri.

Ndërkohë, në këtë mbledhje pritet të miratohen disa ndryshime në Kodin Penal, që kanë të bëjnë me ndëshkimin që do të marrin të gjithë ata persona për masat e qeverisë kundër përhapjes së COVID19.

Gjithashtu do të diskutohet edhe për zgjatjen e afatit të hetimit nga Komisioni Hetimor për shkarkimin e presidentit Ilir Meta dhe për dy dekretet e tij, Anti-KÇK dhe ligjin e pronave.

Përsa i përket masave për deputetët brenda në sallë, mësohet se të gjithë do të jenë të pajisur me maska, doreza dhe dezinfektantë. Në hyrje do të qëndrojë grup personeli mjekësor që do masë temperaturën e deputetëve dhe të administratës që do të jetë brenda.

Për këtë arsye është hapur tenderi për “Blerje pajisje dhe materiale në kuadër të parandalimit të përhapjes së virusit COVID-19”, i cili brenda 2 orëve do të caktojë fituese një kompani që do të marrë përsipër sigurinë e deputetëve dhe administratës së Kuvendit.

Nga ana tjetër, për të ruajtur sigurinë dhe distancën, deputetët nuk do të qëndrojnë ulur në vendet e zakonshme por do të jenë shpërndarë në të gjithë sallën, në lozhat anësore të katit të parë dhe të dytë.

Një vend tjetër i rezervuar do të jetë dhe galeria e pjesës lart të sallës së Kuvendit.