Nëse një lojë futbolli para disa javësh ishte gjëja më normale për disa të rinj, në kohën e koronavirusit bëhet shkak për arrestim nga policia, por edhe për pezullim të një funksionari të policisë së shtetit.
Kështu i ndodhi Rustem Plakës, shefi i policisë rrugore në Vlorë, që bashkë me 10 të rinj ishin grumbulluar në zonën e pyllit të Sodës dhe luanin futboll.
Por përveç grumbullimit në shumë persona, që në këto ditë nuk lejohet, të rinjtë ishin dhe jashtë orarit të lejuar për lëvizje.
Njoftimi i policisë:
Thyen orarin e karantinēs duke luajtur futboll në një fushë futbolli në pyllin e Sodës, Vlorë, ndëshkohen me masë administrative 10 persona.
Karantinohen për 14 ditë, të 10 personat që u kapën duke luajtur futboll, të cilët do të mbahen nën mbikëqyrje nga ana e Policisë.
Me urdhër të Drejtorit të Përgjithshëm të Policisë së Shtetit pezullohet nga detyra Shefi i Seksionit të Qarkullimit Rrugor në Drejtorinë Vendore të Policisë Vlorë, Komisar R. P., njëri nga pjesëmarrësit që luante futboll.
Gjithashtu, nga Drejtoria e Standardeve Profesionale në Policinë e Shtetit nisi hetimi disiplinor për shkelje të rëndë, si dhe u bë pezullimi nga detyra i punonjësit të Policisë G. F., për mospërmbushje apo dështim në përmbushjen e detyrave ose përgjegjësive të caktuara, pasi konstatoi personat dhe nuk mori masë administrative ndaj këtyre shtetasve.
Policia e Shtetit falënderon qytetarët për bashkëpunimin dhe apelon edhe njëherë për qëndrim në banesë dhe respektim të masave kufizuese, duke bërë të mundur parandalimin e përhapjes së COVID-19.
