Profesor Et’hem Ruka ka bërë një analizë të të dhënave që nga data 9 mars kur u konfirmua rasti i parë me koronavirus deri më sot.
Sipas tij, nëse koronavirusi do të ketë këtë ecuri, pandemia do të zhduket brenda dy javëve.
Dekarata e Rukës:
“Shumica e miqve të mi i konsultojnë këto grafiqe. Keni paraqitje grafike në formën e një kulaçi me ngjyra. Sot 53% të shëruar, 42% ata që vuajnë sëmundjen ose aktivë, 5% viktima. Shqipëria ndodhet në një pozicion ku numri i të shëruarve është më i madh se numri i të infektuarve.
Keni një grafik tjetër me kolona, siç e shikoni këtu është numri i të infektuarve në Shqipëri që nga 9 marsi deri më 16 prill. E gjithë kjo kurbë, është një kurbë e cila nuk ka stabilitet, nuk e kalon numrin 30 të infektimeve në një ditë. Ngjan me dhëmbët e një sharre. Javët e fundit, të dhënat janë shumë të thyera.
Kurba tregon në mënyrë dinamike, numrin e të infektuarve çdo ditë. Është një shumë totale, jo analizë sipas vendeve. Është shumë fleksibël, lëviz shumë. Nuk e kalon shifrën 30.
Të jemi të kujdesshëm të afrojmë fundin. Nëse ne ruhemi për 2 javë ne shpëtojmë nga pandemia. Nëse ne zbatojmë karantinën siç duhet, ne për 2 javë shpëtojmë nga pandemia përndryshe rrezikojmë një valë të dytë”, shprehet profesor Ruka për News24.
