Deputetja Rudina Hajdari po vazhdon të ndihmojë familjet në nevojë në këtë situatë krize për shkak të koronavirusit.
Hajdari përmes një postimi në ‘Facebook’, i bën thirrje qeverisë, që fokusin ta ketë pikërisht tek problemi i varfërisë i cili sa vjen dhe bëhet më i madh.
Postimi i plotë:
Këto ditë kam prekur nga afër varfërinë e tejskajshme në qindra familje. Teksa kam bërë detyrën time si deputete duke ju gjendur pranë në këto ditë të vështira, e duke ua lehtësuar sado pak barrën e vështirësisë, dua t’i bëj thirrje qeverisë që fokusin ta ketë pikërisht te ky problem, i cili sa vjen dhe bëhet më i madh.
Kam takuar dhjetëra persona të cilët sot janë pa punë sepse bizneset ku punonin janë mbyllur. Këta njerëz sot nuk kanë asnjë përkrahje dhe janë në fund të rezervave të tyre.
Kam takuar dhjetëra të tjerë që varfërinë e kuronin me ndonjë punë sezonale apo shitje në tregjet e qytetit, e këta persona sot janë pa shpresë.
Kam takuar plot familjarë të cilët gjenden në ankth sepse burimet e tyre financiare nuk ua lejojnë dot më vazhdimin e qëndrimit brenda.
Detyra e qeverisë nuk është t’i trembë me kërcënimin e burgut, por t’i qetësojë e ndihmojë e t’u japë shpresë se e ardhmja do të jetë e mirë për ta dhe familjen e tyre, t’u japë ndihmë konkrete dhe emergjente, t’u gjendet pranë jo me kërbacin e policisë, por me dorën e shtrirë të shtetit social.
Unë në parlament do votoj dhe propozoj vetëm vendime të cilat i shërbejnë njerëzve, që sot i kanë sytë nga shteti për ndihmë dhe shpresë.
Nuk kemi kohë për të humbur!
