Njihuni me surprizat e motit për nesër, ja çfarë do të ndodhë me temperaturat

Moti ditën e sotme është karakterizuar nga masa ajrore të qëndrueshme, duke bërë që të jetë i kthjellët në pjesën më të madhe të territorit përjashtuar vranësirat mesatare deri të dendura në zonat malore.

Temperaturat ishin të ulta në orarin e mëngjesit, ndërsa ato të mesditës nuk arritën vlera të larta duke mos kaluar 6 gradë celcius në zonat malore si dhe deri në 16 gradë celcius në zonat e ulta dhe ato bregdetare.

Për ditën e nesërme pritet që të ketë një përkeqësim të kushteve atmosferike por nuk do të mungojnë edhe orët me diell. Në këtë mënyrë moti do të jetë me vranësira mesatare deri të dendura në relievet kodrinore dhe malore në lindje ndërsa përgjatë ultësirës perëndimore mot me alternime kthjellimesh dhe vranësirash.

Të dhënat janë publikuar nga Shërbimi Meteorologjik Ushtarak, i cili bën me dije se në lindje të territorit si dhe zonën e jugut vranësirat do të shoqërohen me reshje shiu të herëpashershme me intensitet të ulët dhe lokalisht deri mesatar në formën e shtrëngatave.

Në zonën e Juglindjes prej orëve të mesditës do të ketë reshje dëbore në lartësitë mbi 700-800 metër. Mëngjesi do të jetë relativisht i freskëta me vlera të parashikuara nga -4°C në zonat malore deri në 6°C në ato bregdetare. Sa i përket vlerave të parashikuara për mesditën pritet një rritje e lehtë nga 9°C në zonat malore deri në 18°C në ato të ulta dhe ato bregdetare.