“Në maj prisnim rreth 1000-2000 raste”/ Epidemiologu Ylli jep paralajmërimin e fortë: Jemi gati edhe për një valë të dytë

Epidemiologu Alban Ylli zbuloi për A2 edhe pritshmëritë e specialistëve të shëndetit publik në Shqipëri për valën e të infektuarve në Shqipëri.

Ylli paralajmëron që të bëhet kujdes me rihapjen pasi mund të humbim atë që kemi arritur.

“Është plotësisht e mundur që me rihapjen e menjëhershme të kemi një rikthim dhe të humbim atë që kemi arritur deri tani.

Mendonim se gjatë muajit prill do të kishim 50 raste të reja, por asnjë herë se do të kishim mbi 100 raste në ditë. Pra mendonim që në maj do të kishim rreth 1000-2000 raste, por kemi mbetur në nivelin e 600 rasteve. Duket shumë e vështirë që pas sheshimit të kurbës të kemi skenarët mesatarë”, tha ai.

Epidemiologu shtoi se numri i rasteve të reja të konfirmuara çdo ditë dhe mesatarja javore, tregojnë se koronavirusi është mbajtur në kontroll.

“Virusi në Shqipëri po qarkullon në vatra, nuk ka arritur të shpërthejë në popullatë, prandaj i kemi një pamje më të plotë se çfarë po ndodh. Numri i të shtruarve tregon atë pjesë të pandemisë që është më e fortë dhe kjo në një farë mënyrë tregon se ne ishim të përgatitur për të përballuar 700-800 raste të shtruar. Sistemi ynë shëndetësor është i gatshëm për të përballuar edhe një valë të dytë të kësaj pandemie”, tha ai për A2.