Ndryshon sërish orari për fundjavën: Ja rregullat e reja për qytetarët dhe bizneset

Nga dita e sotme do të zgjatet fasha e orarit për mbajtjen hapur të bizneseve të lejuar gjatë gjendjes së fatkeqësisë natyrore për shkak të situatës së krijuar nga pandemia e koronavirusit.

Kështu, bizneset do të rrinë hapur nga ora 05:00 e mëngjesit deri më 17.30, dhe gjithashtu deri në këtë orë qytetarët do të kenë mundësi për të bërë pazare ose kryer ndonjë aktivitet tjetër urgjent.

Do të ketë leje vetëm një person brenda familjes për 90 minuta.

Urdhëri është firmosur nga ministrja e Shëndetësisë Ogerta Manastirliu dhe ishte paralajmëruar më herët nga kryeministri Edi Rama.

“Lejohen të kryejnë aktivitetin e tyre vetëm në fashën orare 05:00-17:30, duke filluar nga dita e hënë 13.04.2020, pikat e shitjes së produkteve ushqimore, me pakicë dhe shumicë, pikat e tregtisë së barnave, produkteve mjekësore dhe institucionet financiare. Hyrja në aktivitete e përcaktuara lejohen vetëm për një person të autorizuar, për çdo familje për kryerjen e shpenzimeve familjare ditore. Autorizimi do të jetë vetëm një herë në ditë dhe do të ketë një afat prej 90 minutash gjatë fashës orare 05:00 deri në 17:30”, shkruhet në urdhrin e Ministrisë së Shëndetësisë.

Por detaji që u vu re nga të gjithë është rregulli i ri për fundjavën.

Do të ndalohen qytetarët dhe mjetet në fundjavë duke filluar nga e premtja 17 prill në orën 17-30 deri të hënën e 20 prillit në orën 05:00, deri në një urdhër të dytë.

Në këtë kohë asnjë biznes nuk do qëndrojë i hapur, as supermarketet apo farmacitë që do lejohen hapur gjatë javës.

Përjashtim do të bëjnë vetëm transporti i mallrave, policia, urgjenca, kompanitë mediatike apo shërbimet që shpërndajnë ushqim.