Kryeministri Edi Rama gjatë komunikimit të tij me qytetarët, ka bërë me dije dhe disa masa të reja, dhe ka paralajmëruar se nëse ato do të shkelen, do të ndëshkohen deri në heqje lirie.
Rama u shpreh se lëvizja e makinave private për punonjësit tashmë do të lejohet, por nëse ata marrin të afërm dhe persona të tjerë me vete, do të ndëshkohen me disa vite te heqjes së lejes së drejtimit, do i sekuestrohet automjeti dhe madje edhe me heqje lirie.
Gjithashtu kreu i qeverisë tha se do të shtohet orari i lëvizjes për të bërë pazar.
“Masat lehtësuese kanë të bjënë me lejimin e plotë të makinave për punonjësit e aktiviteteve të lejuara. Marrja në automjet e personave nga familja apo e personave të tjerë do të ndëshkohet me disa vite të heqjes së lejes së drejtimit dhe me sekuestrim të automjetit dhe me heqje lirie.
Nga ana tjetër do të hapim orarin e lëvizjes për të bërë pazar, do e çojmë në 90 minuta, kryerja mund të behet me automjet privat, do të jetë e mundur por me sanksione të forta, heqje e lejes së drejtimt në raste shkeljesh dhe burg.
Hapja e lokaleve dhe e aktiviteteve të ndaluara do të ndëshkohet me heqje lirie.
Nuk ka rrugë tjetër. Masat duhen lehtësuar pak nga pak për 99.9% të njerëzve që respektojnë rregullat që sakrifikojnë, që mbajnë fëmijët brenda, që përkujdesen për të moshuarit, që orën e lejuar e përdorin edhe për prindërit t’i çojnë ushqime, për të shkuar e kthyer nga puna. Nuk bëhen për këta që hapin lokalet, dhe këta nuk duhet të marrin mesazhin e gabuar që u hap loja.
Duam të lehtësojmë më tutje aktivitetet në njësi individuale në dyqane njësi shërbime, jo lokale, palestra, që nuk janë njësi tregtare brenda qendrave të mëdha tregtare që do të vazhdojnë të jenë mbyllur. Kush ka njësi të tilla të përgatiten të pajisin me maska, doreza me dizinfektantë për klientët, njësitë e tyre.
Mosrespektimi i këtyre masave do të dënohet me konfiskim të gjithçkaje ka brenda, me mbyllje për një farë kohe, dhe heqje lirie, nuk kemi rrugë tjetër.
Po ashtu jemi duke studiuar hapjen e orarit, shtrirjen e fashës orare. Fasha orare është e diskutueshme dhe i qëndroj bindjes që nuk është problemi fasha e orarit.
Por të gjitha këto do të jenë masa që janë gati por do të jenë të përshkallëzuara me pikatore. Jemi në momentin që po ngjisim majën e kodrës dhe do të na thonë ekspertët se çfarë dhe si do të bëjmë”, deklaroi Rama gjatë fjalës së tij.
