Eldin Skuraj, vëllai i 42-vjecarit Ledi Skurajt flet për Report TV, ndërsa sqaron se pse i vëllai e humbi betejën me koronavirusin. Sipas pretendimeve të familjarëve, babai i dy fëmijëve kishte folur me mjekët, ndërsa kishte kërkuar një autoambulancë për shkak të përkeqësimit të gjendjes së tij me kollë dhe temperaturë të lartë deri në 39 gradë.
Familja thotë se, ekipi mjekësor ka mbërritur me vonesë në banesën e tij në Londër, ndërsa në orën 01: 00 pas mesnatës është transportuar me urgjencë në spital, të datës 2 prill në Londër. Që prej atij momenti, i cili ka qenë kontakti i fundit me familjarët, të cilëve Ledi i dërgoi foton e fundit, nga spitali, 42-vjecari ka rënë në gjendje koma dhe nuk është përmendur 11 ditë me radhë. Vëllai i tij Eldin Skuraj sqaron më tej për Report TV, në një bisedë telefonike, se gjatë gjithë kohës ka patur informacione kontradiktore që vinin nga bluzat e bardha atje, ndërsa ende nuk po mësohej mbi gjendjen shëndetësore të të vëllait. Një herë për mjekët gjendja ishte stabël dhe herë të tjera probleme me frymëmarrjen. Kjo ka ngritur dyshimin tek familjarët se 42-vjecari nuk ka patur kujdesin e duhur mjekësor.
Një natë më parë mjekët i thanë që gjendja ishte stabël dhe më pas se mungesa e oksigjenit i kishte dëmtuar trurin. Pas kësaj, sic thotë edhe i vëllai Eldin Skuraj 11 ditë pas qëndrimit në koma, mjekët i hoqën aparaturat, ndërsa Ledi Skuraj ndërroi jetë të shtunën në spital. I vëllai thotë se nuk vuante nga sëmundje të tjera, por se ishte duhanpirës. Ai la pas një djalë dhe një vajzë, ndërsa trupi i tij gjendet ende në spitalin North Middlesex University në Londër. Pjesa tjetër e familjes nëna dhe babai kanë hapur dyert e mortit në qytetin e Lezhës, pa trupin e të birit, që do të varroset në Angli. I vëllai ka hapur një donacion ndihme për familjen e të ndjerit për këdo emigrant që kërkon ta ndihmojë pas kësaj tragjedie familjen Skuraj në Londër.
