Meta “mesazh” Ramës: Masat kufizuese ndaj qytetarëve vetëm për të ndalur koronavirusin

Presidenti Meta ka shpërndarë një mesazh në rrjetet sociale në lidhje me gjendjen e koronavirusit që Shqipëria është duke kaluar këto javë.

Në mesazhin e tij Kreu i Shtetit kërkon që të respektohen rregullat nga të gjithë qytetarët, por thekson se kufizimet për qytetarët duhet të jenë vetëm në funksion të ndalimit të përhapjes së COVID-19.

Meta apelon ndër të tjera për bashkëpunim ndërinstitucional dhe rregullat që të vendosen të jenë në përputhje me Kushtetutën.

Mesazhi i plotë i Presidentit

I ftoj të gjithë qytetarët të respektojnë me përpikmëri të gjitha udhëzimet dhe kufizimet e bëra publike për shkak të pandemisë globale COVID-19, pasi kjo është në interesin tonë të përbashkët.

Në këtë mënyrë jo vetëm mbrojmë shëndetin tonë, por ndihmojmë njëkohësisht mjekët dhe personelin shëndetësor, që po sakrifikon dhe rrezikon për shëndetin e të gjithëve ne.

Ndërkohë, është me rëndësi që çdo akt i Këshillit të Ministrave që miratohet në këtë situatë, t’i nënshtrohet paraprakisht një vlerësimi sa më të thelluar, në proporcion me gjendjen që dikton domosdoshmërisht miratimin e tyre.

Çdo masë e marrë duhet të jetë në përputhje me interesin e përgjithshëm publik dhe kombëtar, dhe në harmoni me hierarkinë e normave në fuqi, në mënyrë që miratimi i masave kufizuese të mos rrezikojë krijimin e konflikteve të reja sociale dhe gjyqësore.

Masat kufizuese duhet të jenë në përputhje me Kushtetutën e Republikës së Shqipërisë dhe të ligjeve në fuqi, por edhe t’i përgjigjen vetëm nevojës dhe urgjencës së përballimit të gjendjes së fatkeqësisë natyrore të shpallur nga Këshilli i Ministrave.

Bashkëpunimi më i ngushtë midis qytetarëve dhe institucioneve është garanci krysore për përballimin sa më efikas të kësaj pandemie për të gjithë.