Edhe pse Tirana fillimisht u cilësua si një nga qytetet më të prekura në Shqipëri nga koronavirusi, mësohet se sot nuk është shënuar asnjë rast, për herë të parë që nga 8 marsi.
Kështu, mësohet se vatra e një familje në Petrelë duket se është mbyllur dhe në 24 orët e fundit nuk ka rezultuar asnjë i prekur.
Por në dy qytete të tjera të vendit, sic janë Kurbini dhe Kruja janë shënuar vetëm sot, 25 raste të reja.
Sipas informacioneve 17 prej tyre janë në Krujë dhe 8 të tjerat në Kurbin.
Të dhënat i bëri me dije drejtoresha e Institutit të Shëndetit Publik albana Fico në një komunikim zyrtar.
“Vijon hetimi epidemiologjik dhe gjurmimi i kontakteve në Krujë ku kanë rezultuar pozitivë 17 persona dhe në Kurbin ku kemi 8 raste të reja. Sot është dita e parë që nga fillimi i epidemisë që Tirana nuk ka asnjë rast të ri.
Ndërkohë vijon të ulet numri i të shtruarve në dy spitalet COVID në Shqipëri, ku janë 40 persona që po marrin shërbim, nga 44 që ishin një ditë më parë.
“Ju informojmë se, në shërbimin infektiv aktualisht janë 32 të shtruar. 5 pacientë janë në terapi intensive.
Në spitalin COVID 2 “Shefqet Ndroqi”, janë 8 pacientë të shtruar. 5 pacientë janë në terapi intensive në gjendje të rënduar, ndërsa 3 pacientë janë në pavion.Në dy spitalet COVID aktualisht po marrin shërbim 40 pacientë“, deklaroi drejtoresha e ISHP.
