Seanca e dytë e jashtëzakonshme e Kuvendit, që po mbahet nën masat e rrepta të vendosura kundër përhapjes së koronavirusit, ka nisur me debate të ashpra mes deputetëve.
Deputetët Andi Përmeti dhe Ralf Gjoni kanë pretenduar duke u ankuar se koha e fjalimeve në Kuvend duhet ndarë në mënyrë të barabartë.
Përmeti është shprehur se koha e mazhorancës për të folur është 95 minuta, ndryshe nga koha e opozitës që është caktuar 25 minuta.
“Mazhoranca do flasë 95 minuta, dhe opozita 25 minuta. Kohën e opozitës jepjani njerëzve që ju bëjnë oponencë, joa tyre që s’kanë votuar njëherë kundër jush. Edhe Majko votoi një herë kundër jush, këta jo”, tha deputeti Andi Përmeti.
Nga ana tjetër, edhe deputeti Ralf Gjoni ka folur me tone të ashpra duke cilësuar disa deputetë si “lëpirësa”, që janë zgjedhur nga opozita por shkojnë pas mazhorancës në votime.
“Nuk mendoj që koha mund të ndahet mes grupeve parlamentare, duhet ndarë mes deputetëve.
Nuk është normale që në momente krize të koronavirusit, kemi çështje jetike për shqiptarët dhe na mohohet e drejta e fjalës.
Druaj se cilësia e jetës parlamentare po cënohet rëndë, dhe dua të rishikohet vendimi. Nëse mazhoranca s’ka dëshirë të ketë opozitë, do të ketë lëpirësa vetëm dhe vazhdoni bëni parlament me lëpirës”, tha Gjoni.
Deputeti Myslym Murrizi ka kërkuar fjalën për procedurë, ndërsa është shprehur se do ta padisë në Gjykatën Kushtetuese “paçavuret” që janë bërë në seancën e datës 16 prill me Kodin Penal, pasi janë shtuar amendamente pas votimit të këtij Kodi.
“Ka patur një amendament në datën 16, por ne nuk kemi qënë në dijeni, pasi e keni bërë pas votimit. Nëse keni patur shtesa amendamenti duhet ta kishit hedhur në votim më përpara. Unë ju ftoj juve dhe mazhorancën që ta marrë në shqyrtim shkeljen e Kushtetutës. Unë si deputet do ta padis paçavuren e Kodit Penal”, përmbylli Murrizi fjalën e tij.
