Pas konfirmimit të 27 rasteve të reja me koronavirus në vendin tonë në vetëm 24 orët e fundit, ka ardhur dhe reagimi i kryeministrit Edi Rama.
Ai ka deklaruar tashmë se kemi hyrë në zonën e zjarrit, dhe ka publikaur një video me pamje të rënda nga bota, të cilat janë krijuar për shkak të pandemisë së COVID19.
Kreu i qeverisë shkruan se ka qenë rezistenca dhe masat e marra nga qeveria, që e ka ndaluar koronavirusin të bëjë kërdinë në Shqipëri, dhe se po ishte ndryshe ne do të kishim përfunduar si ata në pamjet e videos.
Rama shton se asgjë tjetër nuk vlen më shumë se jetët tona.
” *Kujdes, mbani fëmijët larg nga videoja bashkëngjitur. Sot kemi 27 pozitivë! Kemi hyrë në zonën e zjarrit, ku armiku po synon të na marrë më shumë jetë, pasi rezistenca jonë deri tani e ka ndaluar të bëjë kërdinë duke na shkatërruar barrikadën bluzave të bardha! Sot ju bëj një thirrje të fortë të motivojmë të gjitha forcat shpirtërore dhe mendore brenda nesh, për të ushqyer rezistencën, duke mos harxhuar energji për asgjë tjetër!
Sot ju lutem me të gjithë forcën ta vendosni si kryefjalë të çdo dite në vijim moton jetike të luftës sonë: ekonomia bie dhe ngrihet prapë, të vdekurit nuk ringjallen më! Sot asgjë nuk vlen më shumë se jeta dhe mbrojtja e jetës është qëllimi, ne jemi mjeti për realizimin e këtij qëllimi njerëzor, qytetar, kombëtar!
Sot jam i detyruar t’ju jap këtë video rrëqethëse që ta shikoni si do kishim përfunduar, po të mos ishim futur më shpejt se të tjerët në mbrojtje, por edhe si, mos e dhëntë zoti, mund të përfundojmë nëse për mustaqet e çelos hapim vrima në barrikadat tona!”, shkruan Rama krahas videos.
