Biznesmeni Petrit Ago ka bërë një deklaratë të fortë duke thënë se në kulmin e pandemisë, në muajin mars qeveria ka shpenzuar 8.1 miliardë lekë për investime dhe shpenzime që mund të prisnin.
Ago kërkon që të bëhet transparencë pasi po flitet për një shifër të lartë.
Deklarata e plotë:
“Shqipëria ka akorduar për dy paketat bashkë me garancinë sovrane 2.3 % të GDPS-së që është niveli më i ulët në Evropë. Akoma nuk kupton se kush do të paguajë e kush jo. Më duket e paimagjinueshme që në kulmin e pandemisë janë realizuar 8.1 miliardë lekë për investime dhe shpenzime që mund të prisnim nëse ne do të kishim një vizion mikroskopik për atë që prisnim në vijim. Pra kjo do të thotë se kemi patur para por janë shpenzuar kot. Për çfarë arsye pikërisht për këtë muaj ka një kurbë, në muajin mars që është fillimi i vitit që të ardhurat janë më të vogla, janë shpenzuar një shifër kaq e lartë. Është në nderin e qeverisë që qeveria ta deklarojë se cilët janë subjektet që e kanë përfituar. Duhet të bëhet transparencë. Pra me një rishikim të buxhetit duhet të shikohen tenderat.
Gjëja e parë që duhet të bënte qeveria sapo pllakosi pandemia duhet të rishikonte buxhetin 2020 për ndërprerje të disa pagesave që janë me koncesione, me partneritetin publik privat. Edhe në logjikën juridike nuk mund të marrësh asnjë panelitet po i penalizove për një periudhë pasi po bëhet për pandeminë.
E dyta ka dhe koncesione që janë të domosdoshme por mes politikës ka gjithmonë akuza. Këto koncesione nuk janë bërë me garë të hapur”, tha ai për RTSH.
