I shpallur në kërkim ndërkombëtar/ Arrestohet 53-vjeçari i rrezikshëm, përdorte 2 emra

Policia e Shkodrës ka arrestuar ditën e sotme një 53-vjeçar, pasi ishte shpallur në kërkim me akuzën e trafikut ndërkombëtar të lëndëve narkotike.

Mësohet se në pranga ka rënë Fran Malocaj (Françesk Pashku), pas operacionit të koduar “Trushi”.

Sipas njoftimit zyrtar të policisë,  Malocaj rezulton të jetë i dënuar me gjashtë vite burg nga Gjykata e Apelit në Ankona, Itali, në vitin 2018, për kryerjen e veprës penale “Trafik narkotikësh, kryer në bashkëpunim”

Ai mbante dy identitete dhe akuzohet se në bashkëpunim me persona të tjerë, ka trafikuar nga Shqipëria drejt Italisë, një sasi lënde narkotike të llojit kokainë.

Pas arrestimit, Malocaj do të ekstradohet në Itali ku do të përfundojë dhe diënimin që ka marrë nga drejtësia.

NJOFTIMI ZYRTAR I POLICISE

Finalizohet operacioni policor i koduar “Trushi”. Kapet një person i shpallur në kërkim ndërkombëtar, i dënuar nga drejtësia italiane.

Strukturat e Drejtorisë Vendore të Policisë Shkodër, në vijim të punës për kapjen e personave në kërkim dhe shkëmbimit të vazhdueshëm të informacioneve me ZQK Interpol Tirana, Departamentin e Policisë Kriminale dhe misionin Interforza, kanë bërë të mundur lokalizimi në qytetin e Shkodrës, të 53-vjeçarit të shpallur në kërkim ndërkombëtar. Në këtë kuadër, nga strukturat e Drejtorisë Vendore të Policisë Shkodër u zhvillua dhe u finalizua operacioni policor i koduar “Trushi”. Si rezultat i këtij operacioni u bë kapja dhe arrestimi i shtetasit shqiptar Fran Malocaj, 53 vjeç alias Françesk Pashku, 52 vjeç banues në Trush, Shkodër.

Ky shtetas ishte shpallur në kërkim ndërkombëtar nga autoritetet italiane, pasi Gjykata e Apelit ne Ankona / Itali, në vitin 2018, e ka dënuar me 6 vjet burg, për kryerjen e veprës penale “Trafik narkotikësh, kryer në bashkëpunim”. Ky shtetas, në bashkëpunim me persona të tjerë, ka trafikuar nga Shqipëria drejt Italisë, një sasi lënde narkotike të llojit kokainë. Arrestimi provizor u krye me qëllim ekstradimin e tij drejt Italisë, mbështetur në “Konventën Evropiane të Ekstradimit” të vitit 1957 dhe marrëveshjen dypalëshe mbi ekstradimet nënshkruar mes Republikës së Shqipërisë dhe Italisë.