Pas thuajse 1 muaj pushim, futbolli po bëhet gati të rindezë motorët.
Nuk bëhet fjalë për një rifillim të shpejtë, por ekipet kryesore të Europës janë duke menduar tashmë për periudhën se kur do të fillojnë stërvitjet, në mënyrë që javët e para të majit t’i gjejnë gati për të vazhduar kampionatin, që më shumë gjasë do të shtrihet deri në gusht.
Interi dhe Juventus janë dy ekipet e para italiane që i kanë thirrur futbollistët e tyre në bord.
Mësohet se një pjesë e futbollistëve të Interit kanë mbërritur në Milano, ashtu si kanë mbërritur edhe ata të Juventusit në Torino.
Të dyja ekipet që kanë ndarë kreun e kampionatit në këtë sezon pritet ta vijojnë betejën për trofeun deri në javën e fundit, edhe pse bardhezinjtë janë me një marsh më shumë pas fitores në shtëpi në ndeshjen e fundit para se Serie A të ndërpritej.
