Gjatë komunikimit të tij që po zhvillon me qytetarët kryeministri Edi Rama ka treguar se duke filluar nga java tjetër do lehtësohet lëvizja në disa qarqe të vendit.
Sipas tij në këto zona risku nga virusi është më i ulët dhe bëhet fjalë për qarkun e Dibrës, Vlorës dhe Gjirokastrës si dhe bashkitë Divjakë, Himarë, Librazhd, Prrenjas dhe Pogradec.
“Ne nga fillimi i javës tjetër në një sërë zonash të vendit do të kemi një relaksim më të madh sesa në Tiranë apo zona të tjera me risk më të lartë. Nuk do të hapet transporti nga një zonë në tjetrën në asnjë mënyrë edhe për disa ditë dhe javë. Por do të lejohet lëvizje e relaksuar në zonat me risk të ulët, qarku i Gjirokastrës do të ketë më shumë lehtësirë. Po kështu i Dibrës i gjithi. Po kështu bashkia e Divjakës, sikur edhe Saranda, Konispoli dhe Himara, të ndërmjetme. Po kështu zonat Pogradec, Prrenjas dhe Librazhd. Do të bëjmë me dije rregullat që do të funksionojnë në këto zona”, tha Rama.
