Ministri i Shtetit për Rindërtimin dhe COVID-19 Arben Ahmetaj ka reaguar në lidhje me impaktin e krizës së krijuar nga koronavirusi mbi aktivitetin e fasonëve.
Pas letrës së drejtuar qeverisë disa ditë më parë ku paralajmërohej për situatën e vështirë të industrisë fason Ahmetaj bën me dije se ka nisur bisedimet me qeveritë e vendeve fqinje dhe ato të BE-së, për të kërkuar bashkëpunimin e tyre me kompanitë shqiptare, për të mundësuar prodhimin e maskave për shkak të situatës emergjente të shkaktuar nga pandemia.
Përgjigjia e Ministrit Ahmetaj për industrinë fason:
“Në përgjigje të shqetësimit të ngritur prej jush në lidhje me ecurinë e aktivitetit të sektorit të prodhimit të veshjeve dhe këpucëve, me material porositës, si pasojë e situatës ekonomike të krijuar në kushtet e pandemisë covid 19, dëshiroj t’ju bëj me dije në emer të qeverisë shqiptare se janë duke u vlersuar me kujdes efektet e shkaktuara në këtë sektor, si në çdo sektor tjetër të ekonomisë.
Një grup i posaçëm pranë Ministrisë të Rindërtimit dhe Ministrisë të Financave është në përfundim të procesit të vlersimit, të sugjerimeve dhe propozimeve të sipërmarrjeve në disa sektor, përfshirë edhe fasonin, duke konsultuar praktikën e ndjekur në këto kiushte edhe nga vendet e tjera, dhe shumë shpejt në ditët në vijim do të konkludojmë propozimet konkrete për masa potenciale mbështetjeje.
Gjithashtu personalisht kam kontaktuar me qeveritë e vendeve fqinje dhre ato të BE-së, për të kërkuar bashkëpunimin e tyre me kompanitë shqiptare, duke i përshtatur kërkesat në funksion të situatës emergjente, për prodhimin e maskave, veshjeve dhe këpucëve.
Qeveria shqiptare është terësisht e angazhuar për të mos lënë asnjë sektor të ekonomisë pa vëmendje dhe brenda mundësive tona, të mbështesim me masa të dedikuara jo vetëm për vazhdimin e aktivitetit, por mbi të gjitha për vazhdimin e pagesave ndaj punonjsve, të cilat gjithashtu në këtë moment, nuk duhet të lihen jashtë vëmendjes nga kompanitë”, shkruhet në letrën e ministrit për industrinë e fasonëve.
