Falja e qerave për 2 muaj/ Tatimet nxjerrin udhëzimin si duhet të procedojnë qiradhënësit dhe qiramarrësit

Përmes një njoftimi zyrtar, Drejtoria e përgjithshme e Tatimeve njofton të gjithë ata persona të cilët janë qiradhënës, si dhe studentë qiramarrës që kanë një kontratë qeraje, të plotësojnë formularin, në të cilin duhet të shënojnë të dhënat personale, numër kontrate, NID i qiradhënësit, të dhënat e qiradhënësit. Gjithashtu, duhet të shënohen edhe data e lidhjes dhe përfundimit të kontratës si dhe vlera e pagesës mujore.

Kur marrëdhënia midis palëve është Individ me Tatimpagues, duhet të plotësohet një tjetër formular në të cilën duhet të shënohen të dhënat personale të qiradhënësit dhe qeramarrësit, numri i kontratës, NIPT i qiradhënësit si dhe NID i qiradhënësit. Gjithashtu, edhe për këtë marrëdhënie, duhet të saktësohet data e fillimit dhe mbarimit të kontratës dhe vlera mujore që paguan. Në çdo rast aplikimit i duhet bashkëlidhur kopje e kontratës së qirasë apo çdo dokument tjetër që vërteton marrëdhënien kontraktuale.

Personat fizikë ose juridikë të regjistruar, duhet të aplikojnë në llogarinë e tyre në e-filing, tek menuja “Çështjet e mia”, duke ngarkuar Formularin e aplikimit Nr.3 duke plotësuar të dhënat e përcaktuara kur marrëdhënia midis palëve është Tatimpagues me Tatimpagues Në këtë formular, duhet të shënohet numri seria i certifikatës së regjistrimit, të dhënat e sakta të qiradhënësit si dhe NIPT dhe NID i tij. Po ashtu edhe për qeramarrësin duhet të plotësohet e njëjta gjë, si dhe data e lidhjes dhe e përfundimit të kontratës dhe vlera mujore.

Kur marrëdhënia është Tatimpagues me Individ, Drejtoria e Përgjithshme e Tatmeve bëjnë me dije se duhet të plotësohen të dhënat e qiradhënësit dhe qiramarrësit, si dhe NIPT dhe NID i tyre, duke përfshirë kohëzgjatjen e kontratës dhe vlerën mujore. Në çdo rast aplikimit i duhet bashkëlidhur kopje e kontratës noteriale të qirasë.

Të gjithë qiramarrësit e përcaktuar më lart në këtë njoftim, të cilët kanë ankesë për moszbatim të Aktit Normativ nga ana e qiradhënësit, pasi të kenë plotësuar të gjithë procedurën më sipër, të dërgojnë një email në adresën [email protected] , me objekt/titull të Email-t, NIPT në rastin e Personave fizikë/juridikë të regjistruar, dhe NID (Numri Unik i Identifikimit) të Letërnjoftimit në rastin e individëve apo studentëve, duke përshkruar arsyen e ankesës.