Emër i njohur për drejtësinë/ OFL i sekuestroi 3 makina, kush është i dënuari për vrasje

Pas më shumë se një muaji pushim, Operacioni Forca e Ligjit ka zhvilluar ditën e sotme një tjetër aksion, ku janë sekuestruar 9 makina luksoze dhe një pasaportë.

Ndërkohë mësohet se 3 prej automjeteve ishin në pronësi të Eduard Dushku, nga Farka e Tiranës.

Dushku është një emër i njohur për drejtësinë, pasi është vënë disa herë në pranga dhe ka qenë më parë i dënuar për vrasje.

Ndërkohë mësohet se OFL i kishte dërguar formularin për deklarimin e pasurisë, ku dyshohet se ai nuk e justifikon.

Por kush është Eduard Dushku?

Eduard Dushku është pronar i një linje autobuzësh dhe është arrestuar edhe më parë për vepra të ndryshme penale. Së fundmi ai është arrestuar në 12 Gusht të 2017-së në Sauk, pas një sherri për pronën me Skënder Osmanin, 38 vjeç, banues në Tiranë. Gjithashtu Eduart Dushku është arrestuar edhe në vitin 2012, pasi ishte në kërkim për vrasjen e Avdulla Vrapit në gusht të vitit 2011.

Sipas Prokurorisë, Dushku është autor i vrasjes së Avdulla Vrapit në gusht të vitit 2011. Vrasja ka ndodhur pas një zënke mes Albert Vrapit, djalit të viktimës, dhe Besnik Tresës, shofer autobuzi, ku pronar i mjetit ishte Eduard Dushku. Sherri fillimisht ka nisur pas gërvishtjes së makinës së Albert Vrapit nga shoferi i autobusit, që më pas degradoi deri në vrasje.

Njoftimi

Në zbatim të ligjit special për masat pasurore ndaj individëve të dënuar apo akuzuar për krim të organizuar, Operacioni Forca e Ligjit, në zbatim të Aktit Normativ Nr. 1, datë 31.01.2020, bazuar në Nenin Nr. 19 “Sekuestrimi i pasurisë nga Policia e Shtetit në rastet e emergjencës”, Drejtori i Përgjithshëm i Policisë së Shtetit ka nxjerrë urdhrat e sekuestrimit për 9 automjete dhe një pasaportë dhe konkretisht:

– Tre automjete autovetura në pronësi të shtetasit E. D., banues në Farkë, Tiranë;
– Automjeti fuoristradë në pronësi të shtetasit G. K., banues në Maqellarë, Dibër;
– Automjeti Audia A6, në pronësi të shtetases V. H., banuese në Korçë;
– Automjeti në pronësi të shtetases L. M., banuese në Lezhë;
– Automjeti në pronësi të shtetasit A. G., banues në Gjirokastër;
– Automjeti në pronësi të shtetases E. K., banuese në Gjirokastër;
– Automjeti në pronësi të shtetases L. K., banuese në Gjirokastër;

Gjithashtu, bazuar në Nenin Nr. 11 për “Masat parandaluese personale në raste emergjencës”, i është bërë bllokimi i pasaportës dhe i është ndaluar dalja jashtë shtetit, për një afat 6-mujor, një shtetasi, banues në Lezhë.

Me vendosjen e kësaj mase sekuestroje, automjetet i kalojnë në administrim Agjencisë së Administrimit të Aseteve dhe dosjet pasurore të këtyre personave do t’i kalojnë SPAK-ut, për veprime të mëtejshme.

Gjatë kësaj periudhe, OFL nuk ka ndërprerë asnjë ditë punën, por ka vijuar me veprime për kompletimin e dosjeve hetimore të shtetasve që janë subjekt i OFL-së.

Policia e Shtetit, nëpërmjet strukturës së posaçme OFL, është e vendosur që në bashkëpunim me SPAK-un dhe agjencitë e tjera ligjzbatuese, brenda dhe jashtë vendit ta çojë deri në fund këtë operacion jetik, me interes të madh kombëtar e ndërkombëtar.