Ekipi mjekësor shqiptar në Itali/ Reagon mirënjohës Di Maio: Faleminderit Edi Rama!

Pas lajmit se janë nisur drejt Italisë një grup tjetër prej 60 infermierësh, të cilët do të kontribuojnë duke dhënë ndihmën e tyre për pacientët e prekur nga COVID19, ka ardhur dhe reagimi i ministrit të jashtëm italian Luigi Di Maio.

Ai e quan këtë gjest si një dhuratë nga Shqipëria dhe falenderon kryeministrin edi Rama për mbështetjen e treguar ndaj Italisë në këtë periudhë të vështirë.

“Sot mbërrijnë në Itali një grup me 60 infermierë nga Shqipëria për të dhënë mbështetje spitaleve tona. Një ndihmë konkrete, një dhuratë tjetër, që vjen nga miqtë tanë shqiptarë. Faleminderit Edi Rama për solidaritetin dhe ndihmën ndaj Italisë”, shkruan Di Maio.

Kujtojmë se ditë më parë Shqipëria dërgoi një tjetër grup prej 30 mjekësh dhe infermierësh të cilët vijojnë të punojnë në spitalet më të prekura të Italisë ku numri i pacientëve të infektuar nga koronavirusi është më i lartë.