Kryeministri britanik Boris Johnson ka dalë pas një jave qëndrimi në spital pasi u infektua nga koronavirusi.
Ai ka folur menjëherë me anë të një video duke shprehur mirënjohje dhe falenderuar mjekët dhe infermierët që u kujdesën për të.
Johnson u dërgua me urgjencë në spitalin St.Thomas në Londër të dielën e kaluar 10 ditë pasi rezultoi pozitiv me COVID19 pas kryerjes së testit.
“Është e vështirë të gjesh fjalët për të shprehur borxhin tim ndaj mjekëve dhe infermierëve për të shpëtuar jetën time. Përpjekjet e miliona njerëzve në të gjithë këtë vend për të qëndruar në shtëpi ia vlen. Së bashku do ta kapërcejmë këtë sfidë, pasi kemi kapërcyer kaq shumë sfida në të kaluarën”, ka thënë ai mes të tjerash.
Kryeministri britanik tha se kaloi tre net në kujdes intensiv dhe se dy infermiere u kujdesën për të , Jenny nga Zelanda e Re dhe Luis nga Portugalia, ku qëndruan pranë shtratit të tij për 48 orë gjatë momenteve më intensive.
Ndërkohë, mësohet se Johnson nuk do të kthehet menjëherë në punë pasi kështu e ka këshilluar ekipi mjekësor.
Downing Street tha se kryeministri do të vazhdojë të qëndrojë në shtëpi.
