Një plagosje e dyfishtë tronditi sot Tiranën, e cila ndodhi në zonën e Xhamllikut pranë shkollës “Niket Dardani”.
Mësohet se personi i cili i drejtoi pistoletën efektivit të “Shqiponjave” ka qenë Orges Bilbili, killeri i masakrës së Lushnjes, person i shumëkërkuar ky së bashku me Laert Haxhiun, ku në 2017 ekzekutuan me kallashnikov Zamir Latifin dhe Jurgen Hoxhen.
Orges Bilbili ndërkohë rezulton së është dënuar me 7 vite e 4 muaj burgim për trafikim lëndësh narkotike.
Bashkë me Haxhiun, Orges Bilbili është i dyshuar edhe për atentatin, ku u plagosën Xhulio Shkurti (nipi i Aldo Bares) dhe Sajmo Xhelili.
Ndërkohë sot Bilbili nuk i është përgjigjur urdhërit të policisë për tu identifikuar.
Efektivi i Shqiponjave ka parë që Orges Bilbili mbante dorën në çantë dhe e ka pyetur “çfarë ke aty”.
Në këtë moment, qytetari ka nxjerrë pistoletën nga çanta dhe ia ka drejtuar policit. Oficeri i Shqiponjave gjithashtu ka nxjerrë armën dhe i ka bërë thirrje të dorëzohet.
Orges Bilbili është larguar me vrap, por polici e ka ndjekur. Fillimisht polici ka qëlluar në ajër, por Orges Bilbili i ka thënë të largohet ndryshe do e qëllonte.
Kërcënimit efektivi i “Shqiponjave” i është përgjigjur duke hapur zjarr me armën e shërbimit dhe e ka plagosur në këmbë Bilbilin. E plagosur rastësisht ka mbetur edhe një grua.
Ishte po i njëjti efektiv, i cili më pas ka prangosur Orges Bilbilin të shtrirë përtokë.
