Kryetari i Partisë Demokratike ka uruar festën e Pashkëve përmes një mesazhi të shpërndarë në rrjetet sociale.
Në postimin që e shoqëron me foton e vezëve të pashkës, Basha thotë se një ditë e tillë shton besimin se shqiptarët do të dinë t’ia dalin edhe në këtë situatë të vështirë, ku është vendi.
Por një urim më të veçantë Basha ka edhe për të gjithë ata njerëz që në këto ditë janë në shërbim pranë të semurëve me COVID-19, apo atyre që janë në pamundësi financiare për ta festuar siç duhet pranë familjeve të tyre.
Postimi i Bashës:
Të dashur motra dhe vëllezër që kremtoni këtë ditë të shenjtë të Pashkës dhe Ringjalljes së Jezu Krishtit, unë dhe familja ime ju urojmë nga zemra, për shumë vjet Pashkët!
Një urim dhe lutje të veçantë kam sot për ata që po përballen me sëmundjen, për personelin shëndetësor, për punonjësit e policisë, të forcave të armatosura, për klerikët dhe shërbëtorët e Zotit, për prindërit dhe vogëlushët në familjet në nevojë, për të moshuarit, për të sëmurët e më të pamundurit.
Në këto kohë të vështira, drita e shpresës dhe kurajos ndeztë në zemrat dhe mendjet e çdo familje shqiptare besimin se ditë më të mira na presin.
Zoti ju bekoftë ju dhe familjet tuaja, Zoti e bekoftë Shqipërinë dhe shqiptarët kudo ku janë!
