“Asgjë nuk e ndali doktor Krajën“, Basha mesazh prekës për mjekun pensionist që u prek nga COVID-19

Kryetari i Partisë Demokratike, Lulzim Basha i ka dedikuar një mesazh prekës mjekut, Dhimitër Kraja, i cili u rikthye në shërbim të pacientëve, edhe pse kishte disa vite që kishte dalë në pension.

Infektimi i tij me koronavirus, vetëm pak ditë pasi doctor Kraja u rikthye te infektivi për Bashën është një tregues i karakterit të tij që edhe duke e ditur rrezikun nuk u step për asnjë moment.

„Asgjë nuk e ndali doktor Dhimitër Krajën të rikthehet pas 48 vitesh në repartin e infektivit për të ndihmuar dhe shpëtuar jetët e pacientëve. Guximi, humanizmi, profesionalizmi dhe solidariteti njerëzor rrëzuan çdo pengesë, dhe e rikthyen atë në krah të kolegëve të tij, në mbrojtje të jetës dhe shëndetit të bashkëqytetarëve nga virusi i rrezikshëm që e preku dhe atë vetë. I uroj nga zemra doktor Dhimitrit shërim të shpejtë! Urime dhe lutje për shëndetin e tij burojnë nga zemra e çdo shqiptari. Sot si kurrë më parë nderojmë dhe vlerësojmë sakrificat e mjekëve dhe infermierëve tanë që përballen çdo orë me rrezikun dhe sfidat e vështira të shpëtimit të jetëve nga pandemia e COVID-19“, shkroi Basha në facebook.