Policia e Vlorës ka arrestuar një 32-vjeçar në lagjen “Isa Boletini” , në bulevardin “Ismail Qemali” të qytetit pasi është kapur duke shpërndarë lëndë narkotike.
Sipas uniformave blu, në pranga ka rënë shtetasi me iniciale M.B, 32 vjeç, i cili pavarësisht situatës së krijuar nga koronavirusi, nuk është ndalur duke vijuar ‘punën’ në automjetin e tij.
“Mbi bazën e informacioneve të marra në rrugë operative se një shtetas në lagjjen “Isa Boletini”, me automjetin e tij dyshohej se shpërndante lëndë narkotike, specialistët kanë organizuar operacionin policor “Porcion”, në kuadër të të cilit, në rrugën kryesore të Bulevardit “Ismail Qemali”, Vlorë, u kap dhe u arrestua në flagrancë shtetasi M. B., 32 vjeç, banues në Vlorë.
Nga kontrolli i ushtruar në automjetin e këtij shtetasi, uniformat blu kanë gjetur të fshehura 45 doza lëndë narkotike të dyshuara të llojit kokainë, të cilat u sekuestruan në cilësinë e provës materiale, së bashku me automjetin dhe një aparat celular.
Materialet iu referuan Prokurorisë, për veprime të mëtejshme, për veprën penale “Prodhimi dhe shitja e narkotikëve”, thuhet në njoftimin zyrtar.
