“U habita për flamurin amerikan” Ja si i përgjigjet Meta deklaratës së ambasadores Yuri Kim

Mbrëmjen e djeshme pas tubimit të mbajtur nga presidenti Ilir Meta përpara Kryeministrisë, ka reaguar edhe ambasadorja e SHBA në Tiranë, Yuri Kim.

Ajo është shprehur se ka mbetur e habitur nga prania e flamurit amerikan në këtë manifestim dhe ka shtuar se SHBA nuk ka lidhje me këtë ngjarje.

‘E surprizuar të shikoja flamurin amerikane në “manifestimin” e sotëm. Për të shmangur çdo konfuzion, ne duam të sqarojmë se teksa SHBA mbështet të drejtën për të protestuar paqësisht, ne nuk kemi asnjë lidhje me “manifestimin” e sotëm”, shkruajti Kim.

Nga ana tjetër, edhe Ilir Meta i është përgjigjur kësaj deklarate të papritur të Kim.

I ftuar në studion e SYRI TV, Kreu i Shtetit u shpreh se nuk ka parë asnjë lajm pasi e gjithë vëmendja ka qenë te manifestimi.

Ai shtoi se nuk ka asnjë koment për këtë deklaratë.

“Nuk e di se për çfarë deklarate bëhet fjalë, se nuk kam pasur kohë të ndjek se kam pasur në selinë e presidencës shumë personalitete që ndoqën këtë manifestim. Siç ishte Ledio Binako që la punën e tij për të dhënë mesazhin e tij. Po kështu edhe shumë shqiptaro-amerikan me flamurin amerikan. S’kam pas kohë të merrem me asnjë lajm. Kam zero koment për këtë deklaratë. U habita që pas meje ishte një flamur dhe që kishte shumë shqiptaro-ameriakanë pas meje. Pyesni zyrën time për shtyp për më shumë”, tha Meta.