Shpallja e fatkeqësisë natyrore, PD: Tani është detyrë e shtetit të përballojë dëmet

PD ka reaguar pas shpalljes së fatkeqësisë natyre nga qeveria. Përmes një deklarate për mediet, PD thotë se ky vendim është një hap pozitiv, që vjen pas disa kërkesave të njëpasnjëshme nga ana e liderit të opozitës, Lulzin Basha.

Më tej PD thotë se me këtë vendim, tashmë është detyrë e shtetit që të përballojë dëmet e kësaj fatkeqësie që ka pllakosur gjithë vendin.

Deklarata e PD:

Partia Demokratike përshëndet vendimin për shpalljen e gjendjes së fatkeqësisë natyrore, 5 ditë pas kërkesës zyrtare të Kryetarit të Opozitës Lulzim Basha. Akti i shpalljes së masës së jashtëzakonshme duhet plotësuar pa humbur më asnjë ditë nga Qeveria me vendimin për masat e kompensimit të dëmeve, procedurat, afatet, strukturat shtetërore përgjegjëse për vlerësimin e dëmeve, si dhe dëmet dhe subjektet që kompensohen. Sipas Kushtetutës dhe ligjeve të vendit, është detyrim i shtetit shqiptar të përgjigjet për dëmet që shkaktohen nga pasojat e një fatkeqësie.