Revoltë në burgun e Reçit, të burgosurit të frikësuar nga koronavirusi

Koronavirusi dyshohet se ka arritur edhe në burgun e Reçit në Shkodër. Denoncimi është bërë nga një i dënuar, i cili ka zhvilluar një bisedë telefonike me gazetarin Senad Nikshici. I burgosuri tregon se 6 ditë më parë shoku i tyre i qelisë ka takuar një të afërmin e tij, i cili kishte ardhur nga Italia.

I burgosur tregon se një nga shokët e tij të qelisë është shumë i sëmurë. Atij i bie të fikët çdo tri ditë, sikur është me epilepsi dhe një tjetër që i ka ardhur i afërti nga Itali dhe ka të vjella dhe dhimbje koke. Të burgosurit kanë filluar revoltën, duke premtuar edhe vetëflijimin.

“Tek burgu na vijnë e na bëjnë presion. Kemi dy të sëmurë, njërit i bie të fikët çdo dy ditë sikur të vuante nga epilepsia. Kurse një tjetër ka një javë që ka ardhur nga Italia është me të vjellura. Ky nga Italia ka ardhur ka nja 6 ditë dhe ka takuar robin e tij në burg. Ky tani ka shumë ankesa dhe ka dhimbje koke, këtu në burg s’ka as spital.

Mjeku ka ardhur e ka kontrolluar me aparat tensioni. Nuk i kanë sjellë asnjë tampon. Ne i kemi dhënë që nuk futemi në dhoma dhe kemi hyrë në grevë urie të gjithë si sektor. Kemi nisur sot, se nga sot i kanë nisur simptomat e forta atij. Njëri ka qenë në dhomë është me atë, ka zemër e tension.

Nëse ai e ka, e kemi të gjithë si sektor. Jemi 36 vetë në maksimumi 50 metra katror. Ndërrohen edhe policët. Këtu po digjen batanijet dhe të gjitha gjërat. E kemi përshkallëzuar revoltën. Kërkojmë analiza për nga Tirana. Disa kanë vendosur që të djegin dhomën e të vetëflijohen sepse nuk e gjejmë të drejtën tonë”, është shprehur i dënuar.

Ndërkaq burime të Fast News Albania bëjnë të ditur se në burgun e Reçit kanë shkuar përfaqësues të Drejtorisë së Përgjithshme të Burgjeve.